CEBU, Philippines - Nakasakmit na usab ang mga elemento sa Cebu Provincial Anti-Illegal Fishing Task Force (CPAFTF) og 48 ka mga kahon sa mga pinabuthang isda nga nagkantidad og P120 mil didto sa barangay Kot-kot lungsod sa Liloan sa miaging adlaw.
Kini nunot sa nagpadayon nilang subsob nga operasyon batok sa illegal fisher. Sumala pa ni Jeofrey Merencillo ang team coordinator sa CPAFTF nga wala gyud magsilbe ang bag-ong taktika sa mga ilegal nga mananagat nga misagop sa paagi sa pagsagol ang mga pinabuthang isda ngadto sa mga isda nga nakuha sa legal nga paagi.
Matud pa ni Merencillo nga nasakpan nila nga ang mga dagkong isda nga pinabuthan gisuway na unta pagtumod sa kamerkadohan sa siyudad sa Sugbo.
Apan iyang gitataw nga ang maong pinabuthang isda nga gikan sa probinsiya sa Palawan wala makaikyas sa kaabtik sa mga elemento sa CPAFTF kinsa maoy nakapakgang sa maong mga kargamento.
Matud pa ni Merencillo nga gibanabanang mokantidad og kapin sa P120 mil ang maong mga produkto sa kadagatan nga gipang-apod-apod dayon sa task force ngadto sa mga balay kalooy ug sa Cebu Provincial Detention and Rehabilitation Center (CPDRC).
Gihikay dayon nila ang tukmang kaso nga isang-at batok sa tag-iya sa maong kargamento.(WC) (BANATNEWS)