CEBU, Philippines - Temporaryong gipahunong ang dry-run sa paglabay og basura agi sa bukirong bahin sa siyudad sa Sugbu padulong sa lungsod sa Consolacion gumikan sa mga nakitang problema sa mga trak sa basura pag-agi sa maong lugar.
Gipadayag kagahapon ni Konsehal Nida Cabrera nga temporaryo una nila kining hunungon aron mangita og solusyon sa mga nakitang problema. Nagkanayon si Cabrera nga tungason ang dalan sa barangay Talamban dayon barangay Pit-os padulong sa maong landfill nga nahimutang sa barangay Pulog, Consolacion, gagmay usab ang dalan maong maglisod gyud ang mga dagkong garbage trucks.
Aduna say ubang bahin sa agianan nga humok ug nangalubong ang mga ligid sa mga trak ilabi na karong panahon na sa ting-ulan. Nasuta usab nga adunay mga parte sa dalan nga walay suga maong peligro gyud alang sa mga trak nga maglabay og basura panahon sa kagabhion.
Nunot sa nakitang mga problema gikonsiderar nga dili pa andam ang maong lungsod sa pagdawat sa mga basura gikan sa dakbayan ug karon adto nalang una ilabay og balik ang basura sa Inayawan Sanitary Landfill.
Ang paagi sa maong rota maoy nahuna-hunaan sa dakbayan sa Sugbu human mopagawas og resolusyon ang dakbayan sa Mandaue nga nagdili na sa mga garbage trucks sa Cebu City nga makaagi sa ilang teritoryo.
Nunot niini higpit usab nga giimplimentar sa Cebu City ang ordinansang nagdili sa tanang Mandaue-Cebu City routes nga makasulod sa downtown Cebu City hinungdan nga mikisi-kisi ang mga residente sa duha ka siyudad.
Hinuon bisan paman niini ang duha ka dakbayan pulos nangangkong dili kini binawsanay ang ilang gibuhat .
Si Atty. Benjamin Cabrido, ang environmental consultant sa dakbayan sa Mandaue nagkanayon nga kinahanglang adunay diyalogo sa duha ka siyudad nga himuon tungod kay ang apektado mao ang mga konstituwente sa duha ka siyudad sa nahitabo karon. (BANATNEWS)