CEBU, Philippines - Nabulit sa samad pinusilan ang usa ka giingong ikaduha sa listahan sa mga drug pusher sa lungsod sa San Remegio pasado alas-10 sa miaging gabii sa terminal sa bus sa barangay Hagnaya.
Ang biktima nailhan nga si Wilmy Condor De la Cruz alyas Jaime dela Cruz, 44, molupyo sa maong lugar.
Samtang ang mamumuno gihulagway lang sa mga estambay nga nagsuot og bull cap nga armado og pistola kinsa daling nakapahilayo sa maong dapit. Sa imbestigasyon sa kapolisan nasayran nga ang biktima nagsakay og motorsiklong Honda XRM nga adunay plakang 7821-PR paatubang sa pantalan sa nahisgutang barangay tungod kay aduna kini sugatong tawo.
Apan sa diha nga naabot na kini sa dapit sa Hagnaya Bus Terminal kalit nga mibutho ang usa ka lalaki diha sa luyo sa biktima ug diretso sa pagpusil sa biktima.
Ang biktima naigo sa nagkadaiyang parte sa iyang kalawasan ug dihang natumba gibiyaan sa mamumuno kinsa misakay og balik sa usa ka kolor pula nga Honda XRM ug misutoy og biya sa terminal.
Daling gitabangan sa mga estambay sa maong lugar nga madala sa Don Severo Verallo District Hospital si Dela Cruz apan gideklarar kini nga dead on arrival.
Sa pakisusi sa kapolisan sa crime scene nakuha ang upat ka kabhang sa kalibre .45 ug duha ka slugs gikan sa wala masayring klase sa armas.
Samtang nakuha usab sa posesyon ni De la Cruz ang usa ka Black Widow .22 magnum revolver nga adunay upat ka buhing bala; tulo ka cellular phones; usa ka yellow green nga pitakang adunay sulod nga P1, 345 cash ug identification cards.
Ang hepe sa San Remegio Police nga si Inspector Jose Rovic Villarin, mibutyag sa dihang nahinabi sa igsuong pamantalaan sa Banat News nga The Freeman nga si De la Cruz gisundan sa mga mamumuno gikan pa sa ilang panimalay.
Matud pa ni Villarin nga ila karong gisubay ang motibong pagkalambigit sa biktima sa illegal nga drugas.
“Possible nga murag wala ni siya ka-remit sa iyang kita,’’ matud pa ni Villarin.
Sumala pang Villarin nga si De la Cruz maoy ikaduha ni Arman Tipon-Tipon nga maoy nag-una sa listahan sa mga illegal drug personalities sa kapolisan sa maong lungsod.
Si Tipon-Tipon nasikop usab kini sa Provincial Intelligence Branch duha ka bulan ang milabay.
Midugang si Villarin nga ila karun nga gisugdan ang ilang imbestigasyon pinaagi sa pagsusi sa mga numero sa cellphone sa biktima. - BANAT NEWS