CEBU, Philippines - Nabuko-buko sa bala human pusila samtang nagtubag sa sugo sa lawas kagahapon sa kaadlawon diha sa barangay Lawaan lungsod sa Alcantara.
Ang biktima nailhan nga si Polan Garao, 20, molupyo sa maong lugar diin nakaangkon og samad pinusilan sa iyang buko-buko samtang ang kapolisan padayon pa sa imbestigasyon sa pag-ila sa gikatahapan.
Sumala pa nga diha sa maong lugar ang biktima aron mag-disko apan dihang gibati kini sa sugo sa lawas (nalibang) miadto kini sa ngitngit nga dapit sa maong lugar.
Wala na kini mahibalik maong gipangita kini sa mga kaubanan ug dihang napalgan nagbuy-od na kini nga nagkadugo ug wala nay panimuot hinungdan nga gidala kini sa Badian District Hospital ug gibalhin kini sa Vicente Sotto Memorial Medical Center. Sa pakighinabi sa Banat News ni PO2 Euberto Alcazaren, sa Alcantara Police Station posibleng naalaang kawatan ang biktima tungod kay ngitngit ang maong lugar. - BANAT NEWS