CEBU, Philippines - Duha ka mga lalaking gipasanginlang manghimoay og mga paltik nga armas ang nadakpan sa gihimong entrapment operation sa miaging alas 2:30 sa hapon diha sa barangay Poblacion sa dakbayan sa Danao.
Tungod sa impormasyong namuhat ug namaligya og armas sila si Jonathan Pasaol, 50, ug Jerry Gonzales Roca, 43, pulos nagpuyo sa barangay Poblacion sa naasoy’ng siyudad milusad og operasyon ang kapolisan batok kanila.
Gamit ang poseur buyers mi-order og mga armas ang kapolisan nga ilang gipatuong dad-on sa Mindanao nga mobalor og P135 mil hangtud nga nagkasinabot sila nga ilang kuhaon niadtong Huwebes sa hapon.
Si Supt. Rodulfo Albotra, hepe sa Provincial Intelligence Branch nga nahinabi sa Banat News nagkanayon nga iyang gikasabot si Roca nga mo-order siya og napulo ka .45 nga kalibre sa armas ug tulo ka KG-9.
Sumala pa nga gibungatan siya niini og P135 mil ug gikasabutang sa Huwebes nila kini kuhaon. Matud pang Albotra sa sinugdanan gusto ni Roca nga adto sa ilahang lugar himoa ang transaksyon.
Apan mipatigbabaw ang tawag sa kwarta maong ang kapolisan maoy natuman dihang ilang giingnan nga nagdali sila nga makabalik sa Mindanao.
Tuod man si Roca ug Pasaol nagdali sa pakigkita sa mga polis luwan sa usa ka motorsiklo ug may backpack nga gisudlan sa maong mga armas, human magtunolay sa armas ug ‘kwarta’ nga budol gisikop dayon ang duha.
Nakuha sa kapolisan ang siyam ka .45 nga kalibre pistola nga dunay mga magazines ug tulo ka KG-9 ug mga magazines niini. Si Pasaol sa dihang nahinabi sa mga tigbalita nagkanayon nga 27 na siya ka tuig nanghimo og armas ug ikalima na kining higayon nga nadakpan siya sa kapulisan.
Matud ni Pasaol wala siyay laing nakamahoan nga trabaho gawas niini, samtang si Roca mitug-an nga 16 na siya ka tuig nga nanghimo og armas apan mao pa kini una niyang higayon nga nadakpan.
Si Sr. Supt. Patrocinio Comendador, hepe sa Cebu Provincial Police Office (CPPO) nagkanayon nga ang duha mga gunrunners ug gun makers diha sa Danao. Gituohang gamiton sa mga krimen ang mga armas gikan sa Danao. (EIM) (BANATNEWS)