CEBU, Philippines - Ang pagkasikop sa usa ka kanhi sakop sa Barangay Intelligence Network (BIN) niadtong Domingo usa sa susihon ug kompirmahon kun ang usa ka polis mi-tolerate ra ba sa illegal nga kalihokan sa iyang ugangan nga suspetsado.
Si Sr. Supt. Patrocinio Comendador, hepe sa Cebu Provincial Police Office (CPPO) mimando ni Sr. Insp. Ceferino Tabay, hepe sa Bogo City Police Station sa pagpahigayon og imbestigasyon batok sa iyang sakop kansang pangalan gipugngan lang una sa Banat News kun gi-tolerate ra ba niini ang pagpamaligya og shabu sa ugangan niining si Carlito Bondesto Jr.
“Kung gibadlong niya at least duna siya’y gihimo but if ni-tolerate siya labi na if dunay involvement sayop na kana,” matud pa ni Comendador.
Gidugang niini nga iya usab susihon kun duna bay lapso nga nahimo sa maong polis sa dili pa niya manduan ang Provincial Investigation and Detective Management Branch (PIDMB) alang sa pagpahigayon na og pormal nga imbestigasyon batok sa maong polis.
Sa linain nga interbyu sa maong polis, siya mitug-an nga daw wala panumbalinga sa iyang ugangan ang iyang mga tambag nga mobiya na sa ilegal nga kalihokan sanglit nagpadayon man hinuon sa pagpamaligya sa ilegal nga negosyo.
“Dili man ko ganahan motagad ana niya ug moadto nas’ balay magpangutana man gani na kung naa ba ko,” matud pa niya sa telepono sa dihang na-interbyu sa The Freeman igsuong mantalaan sa Banat News.
Siya mipadayag nga iyang paabuton nalang kun dunay himuon nga imbestigasyon batok kaniya ug andam siyang motubag niini.
Sa nasayran si Bondesto nadakpan sa buybust operation nga gipahigayon sa mga sakop sa Provincial Intelligence Branch (PIB) niadtong Domingo sa buntag diha sa barangay Pungtod sa dakbayan sa Bogo.
Nakuha kaniya ang unom ka pakete sa shabu, usa ka medium size pack ug usa ka dakong putos nga gidudahang may sulod nga shabu nga nagkantidad og P40,000, usa ka P500 ug expired nga BIN identification card.
Si PO3 Reynaldo Solante, Team leader sa PIB miingon nga ang reklamo sa mga residente batok kang Bondesto labot sa pagpamaligya niini og shabu .
Ang kapulisan miklaro nga si Bondesto usa ka level two drug pusher. Kasong kalapasan sa Section 5 sa RA 9165 ang gipasaka nga kaso sa kapulisan diha sa Regional Trial Court sa dakbayan sa Bogo batok kang Bondesto. - BANAT NEWS