CEBU, Philippines - Napalgang patay ang usa ka lolo sa hagdanan sa ikaduhang andana sulod sa usa ka motel sa may North Reclamation Area sa barangay Carreta siyudad sa Sugbu sa miaging gabii.
Giila ang namatay nga 75-anyos nagpuyo dinhi sa dakbayan sa Sugbu giingong adunay kaubang babaye dihang mi-check-in niadtong alas 3:30 sa hapon.
Si Welmer Cenas Ares, 34, supervisor sa Amihan Motel maoy mipatawag sa mga sakop sa Emergency Rescue Unit Foundation (ERUF) human niya napalgan ang tiguwang sa hagdanan apan zero-zero vital sign na kini.
Sa gihimong imbestigasyon nila ni SPO4 Alex Dacua, PO3 Edario Manatad, PO2 Michael Codaste ug PO1 Esmer Escutar sa Homicide Section uban sa mga sakop sa Crime Scene Investigation Unit (CSIU) nasuta nga ang biktima nagbuwa ang iyang baba nga naglingkod sa hagdanan sa second floor sa maong hotel.
Matud ni Ares nga sa wala pa mapalgi ang patay’ng lawas sa biktima mi-check in kini alas 3:30 sa hapon nga dunay kuyog nga usa ka wala mailhing babaye. Ang maong babaye wala na dihang nadiskobrehan ang patay’ng lawas sa biktima.
Nasuta nga walay samad sa kalawasan nga timailhan nga dunay foul play ang kamatayon niini apan nagtuo silang giatake kini sa sakit. (Rey B. Pasaporte/EIM) (BANAT)