CEBU, Philippines - Maayong pagkalagpot sa 5-anyos nga batang babaye human kini mabangga-i sa usa ka pribadong sakyanan pasado alas-4 sa miaging adlaw sa barangay Pajo lungsod sa Daanbantayan.
Ang biktima nailhan nga si Gingging Briones, 5, molupyo sa maong lugar samtang ang drayber sa nakabangga nga sakyanan nailhan usab nga si Marcelino Pepito, 40, taga barangay Maya sa nahisgutang lungsod.
Sa imbestigasyon sa kapolisan, ang Ford New Everest nga adunay plakang YGX-636 nga gimaneho ni Pepito gikan sa barangay Maya ug paatubang kini sa syudad sa Bogo. Apan pag-abot sa nahisgutang lugar gikatahong kalit lang nga milabang ang biktima ug wala na makapugong ang brake ni Pepito ug napunggit kini.
Gitabang ni Pepito ang biktima ug gidala sa Daanbantayan District Hospital apan pipila ka minutos nakabsan na kini sa iyang kinabuhi.
Sa pakighinabi sa Banat News ni PO2 Ramil Claro mibutyag kini nga base sa medical result sa biktima namatay sa Cardio Respiratory Arrest secondary to celebral contusions.
Kasong Reckless Imprudence Resulting to Homicide ang giandam nga kaso batok ni Pepito kinsa nagtingkagol karon sa karsel. (BANAT NEWS)