CEBU, Philippines - Gibutyag kagahapon ni 3rd district Congressman Pablo John “PJ” Garcia nga migawas na ang iyang gitagana nga P 5 milyones nga gahin alang sa road infrastructure project sa lungsod sa Asturias lamang.
Matud pa ni PJ nga ang maong gahin nadawat na sa 3rd Engineering District sa Department of Public Works and Highways ( DPWH)-7 alang sa pagsugod na sa mga trabahuon sa kadalanan sa nahisgutang lungsod.
Matud pa niya nga ang maong gahin gitumong aron aspaltohon ang mga kadalanan sa tanang mga barangay sa lungsod sa Asturias.
Gihimo sa kongresista sa ikatulong distrito ang maong lakang tungod kay matud pa niya gipasagdan lang ang maong lugar sa mga nanglabay nga kongresista sa maong distrito.
Matud pa niya nga wa gyuy nahimo ang gipulihan niyang kongresista sa maong distrito ug maningkamot siyang ang tanang problema inprastraktura sa iyang distrito iya gyud nga masulbad buwahan to kun mapulihan man siya og laing kongresista di siya ikapanugilon nga nagmika lang siya sa iyang pangatungdanan.
Iyang gipadasig ang tanang kapitan sa barangay ug mga mayor sa mga kalungsoran nga sakop sa ikatulong distrito nga mopadangat kaniya sa tanang mga kakuwangan sa ilang tagsa-tagsa ka lugar aron makahimo dayon siya og lakang niini.
Matud pa niya nga gusto siyang mobiya sa maong distrito nga limpyo ug dili magbilin og maot nga dungog sama sa mga kongresista nga nahauna kaniya.
Ang mga tawo sa maong distrito nga nakaamgo nga taspokan ang kongresista nila igo lang sa pagpangyamiid kun makamatngon sila nga igo lang sa pagarpar ang madestinong magbabalaod sa ilang lugar.
Gani iyang gipahibawo nga hayan masugdan ang maong proyekto sa hinapus nga bulan ning tuig 2011.
Samtang si Mayor Alan Adlawan sa Asturias miingon nga dako kaayo ang iyang kalipay sa iyang nadungog nga pasalig ni Congressman PJ.
Dugang pa niini nga ang kahingpitan unya sa maong proyekto maghatag og kalambuan sa ilang lungsod kay sayon na man lamang unya ang transportasyon sa ilang lungsod. (BANAT NEWS)