CEBU, Philippines - Gitambungan ni Governor Gwendolyn Garcia ang National Celebration sa ika-62 Founding Anniversary sa Peoples Republic of China nga gipahigayon sa Marco Polo Hotel ning siyudad sa Sugbo sa miaging gabii.
Ang gobernador maoy usa sa mga pinasidunggang dinapit sa maong kalihokan nga gitambungan nila ni Chinese Consul General He Shijing, Mayor Michael Rama, ug uban pa.
Sa iyang pagpakigpulong, gibutyag ni Consul General He Shijing nga daghang mga Chinese national ang mibisita sa lalawigan sa Sugbo nunot sa kasayuran bahin sa makapasibot nga mga kalamboan dinhi sa lalawigan.
Si Gobernador Garcia miingon usab nga ang gidugayon sa katuigan sa founding day sa Peoples Republic of China mao usab ang gidugayon sa panaghigalaay sa mga Cebuano ug mga Intsik. (BANATNEWS)