CEBU, Philippines - Padayong gibantayan sa kapolisan sa dakbayan sa Talisay ang kahimtang sa kalinaw sa Corona Del Mar subdivision sa barangay Pooc, sa maong dakbayan sumala pa ni Supt. Eddie Recamara, ang hepe sa kapolisan sa maong lugar kagahapon.
Matud pa ni Recamara nga wala sila mohatag og kompiyansa bisan nahilom na ang kagubot sa sulod sa maong subdivision aron kalikayan ang dugoon unyang panghitabo sa maong dapit.
Ang kaguliyang nga mihugpa sa maong subdivision nagsugod dihang gipakitaan ni Byron Garcia , igsuon ni Gobernador Gwendolyn Garcia sa iyang armas ang usa ka Amerikano nga iyang silingan nga mikabad og dagan sa kahadlok nga pusilon siya ni Byron.
Dayon gaalihan sa kanhi Capitol consultant ang entradang agianan sa bag-ong subdivision nga Escala nga iya gihapon sa Filinvest Development Corporation (FDC) pinaagi sa iyang mga sakyanan.
Sa kalagot sa kontraktor nga nagtrabaho sa Alcala gipang-alsa ang mga sakyanan ni Byron ngadto sa daplin busa nakaagi na ang mga heavy equipment sa maong kontraktor.
Usa sa katarungan nga di unta paagion ni Byron ang mga dagkong sakyanan sa maong dapit mao ang kabalaka nilang mangagusbat ang karsada sa subdivision.
Apan bisan pa niini wa kahuygo ang FDC human luwati ni Mayor Socrates Fernandez ang mando sa pagpahunong sa ilang trabaho tungod kay giingong aduna kini kalapasan nga nahimo.
Sa laing bahin, gipaabot sa kapolisan si Wayne Morris, ang kontra ni Byron nga moatubang sa iyang reklamo batok kang Byron didto sa barangay.
Si Morris misumbong sa kapolisan tungod kay gipakitaan siya ni Byron sa AK-47 nga maoy hinungdan nga mikaratel siya og dagan sa miaging adlaw.
Si Recamara nagkanayon nga ang maong kaso gitugyan nila sa barangay apan kun di mahusay sa barangay, mahimong mosang-at si Morris og kaso batok kang Garcia sa piskaliya. (BANATNEWS)