CEBU, Philippines - Masaligon ang kanhi undersecretary sa Dangerous Drugs Board (DDB) Paul Clarence Oaminal nga ipakanaug na ang desisyon sa pito ka tuig nang kaso sa mega shabu laboratory sa dakbayan sa Mandaue nga naglambigit og mga langyaw nga akusado sa dili pa matapos karung tuiga.
Kombinsido si Oaminal nga makombikto ang tanang mga akusado tungod sa kalig-on sa ilang mga gidusong ebidensiya ug mipasabot nga ang kalangay niini nagumikan lang sa mga mekanismo nga gipasubay sa hustong proseso.
Gitataw ni Oaminal nga ang maong kaso mao lang karun ang nagbinugtong nga aktibong kaso dinhi sa nasud nga naglambigit sa dakong sindikato sa drugas nga nagpabiling lig-on ug buhi sukwahi sa ubang mga kaso nga nabasura lang ug gi-archived.
Ang maong kaso nahitabo kapin pito na ka tuig diha sa dakbayan sa Mandaue niadtong petsa 24 sa Septiyembre sa 2004 dihang ang Philippine Drug Enforcement Agency (PDEA)-7 gipangulohan pa ni regional director Amado Marquez Jr. kinsa namatay nalang apan pabiling wala pa mahuman ang kaso. (BANATNEWS)