CEBU, Philippines - Nagtingkagol sa karsel ang usa ka babayeng nanag-iya’g karenderya nga giingong maoy tigbaligyaan og shabu sa mga call center agents human masikop sa buy bust operation sa mga ahente sa Philippine Drug Enforcement Agency (PDEA) Central Visayas sa miaging gabii diha sa sitio San Miguel sa barangay Apas siyudad sa Sugbu.
Si Maria Shiela Pascual gidakop sa grupo ni Intelligence Officer (IO) 5 George Cansancio human gikatahong mitunol og duha ka paketeng gidudahang shabu nga tag P200 ang matag usa ngadto sa babayeng poseur buyer.
Nabawi usab sa mga ahente sa PDEA ang P200 nga marked money nga gigamit sa buy bust operation.
Si Jessie Tabanao tigpamaba sa PDEA nga nahinabi sa Banat News nga duha ka semana na ang nakalabay dihang nakadawat sila og reklamo gikan sa mga silingan niini kabahin sa kalihokan sa suspek.
Tungod niini ilaha dayong gipanid-an si Pascual ug human napositibong namaligya kini og ilegal nga drugas gilusad dayon ang operasyon.
Matud ni Tabanao kasagaran sa kostumer ni Pascual mao ang mga call center agents nga padulong mo-duty sa trabaho diin mopalit kaniya og shabu ug anha usab pasuyopon sa ilang balay.
Gidugang ni Tabanao nga moabot na sa pagpamaligya og shabu si Pascual diha sa luyo nga bahin sa Regional Training School (RTS)-7 hinungdan nga gilainan nang nagtan-aw kaniya ang mga residente maong sila mireklamo.
Gawas sa duha ka paketeng shabu nga nakuha sa mga ahente sa PDEA nakuha usab ang iyang cellphone nga duna pay mga text messages gikan sa iyang mga kustomers nga buot mo-order kaniya og shabu.
Si Pascual nga buot untang kuhaan og reaksyon sa mga tigbalita kagahapon nagdumili kini paghatag sa iyang reaksyon ug milugnot hinuon sa dihang iyang pasaksihan ang imbentaryo sa ebidensya nga pirmahan sa usa ka tigbalita.
Apan si Pascual mipadayag nga wala gyud siya makuha-i og butang sa mga ahente sa PDEA ingon man ang kwarta.(EIM) (BANATNEWS)