CEBU, Philippines - Nanamilit na kagahapong adlawa sa buhatan ni Gov. Gwendolyn Garcia si outgoing regional director Ager Ontog Jr. uban ang mohulip kaniya isip bag-ong regional director sa Police Regional Office-7 nga si Marcelo Garbo.
Mapasalamaton sa gobernador si Ontog tungod sa suporta nga gihatag niini ngadto sa kapolisan ilabi na sa mga basic needs niini sa kahimanan ug sakyanan.
Samtang nakadayeg usab si Ontog sa gipakitang liderato ni Garcia sa ilang anti-criminality campaign diin aktibo kaayo kini.
Nagmalaumon si Ontog nga unta promosyon ang iyang madawat sa kaulohan kun siya mobalhin na.
Karung Lunes sa buntag ipahigayon ang turn-over of command sa Police Regional Office diin si Garbo na ang hingpit nga molingkod.
Matud pa ni Garbo nga usa siya ka ‘balikbayan’ tungod kay nadestino na siya sa PRO-7 niadtong tuig 2008.
Samtang wala pa usab mibutyag si Garbo sa mga lakang nga una niyang buhaton kun siya molingkod na sa pwesto.
Butyag usab ni Garbo nga nakadayeg siya sa gobernadora sa pagpadagan sa probinsya. “I am a fan of her(Garcia). I’ve seen how Cebu run by the governor,” pasabot pa ni Garbo.
Niadtong buwan sa Agosto 2010 nadestino sa PRO-7 si Ontog isip hulip ni Chief Supt. Lani-O-Nerez nga tua na usab sa Camp Crame. (EIM) (BANATNEWS)