CEBU, Philippines - Gisugdan dayon sa mga sakop sa Sanguniang Kabataan (SK) Federation sa probinsiya sa Sugbo ang ilang bag-ong tahas sa paglusad og kampanya batok sa human trafficking pinaagi sa usa ka seminar human ilusad sa kagamhanan ang Movement Against Human Trafficking Advocates ( MATA) nga gipangunahan ni Governor Gwen Garcia uban sa suporta ni US Ambassador to the Philippines Harry Thomas Jr.
Sumala ni SK Federation President Aladin Williame Caminero sa Probinsiya sa Sugbo nga ang sentro sa maong seminar mao ang pagpalig-on sa ilang kaakohan o capability building sa SK Federation.
Kini sa tinguha nga mahimo pa silang mas takus sa pagtuman sa ilang tahas sa pagpakusog ug pagpalig-on sa kampanya batok sa human trafficking kun paglingla sa mga aplikante og trabaho.
Gipahibawo ni Caminero nga ang nakadaug nga poster sa ilang gipahigayong poster making contest bahin sa Human Trafficking maoy ilang gamiton nga poster nga ipapilit sa mga pantalan, tugpahanan, hotel ug restaurant, mga bus ug uban pa.
Kini aron ang tanang mga tawo masayod sa kampanya sa probinsiya ug mutabang usab sa pagsumpo sa human trafficking. (BANAT NEWS)