CEBU, Philippines - Mga ahensya sa gobiyerno may pagduha-duha sa media tungod sa kabalakang iwadwad ang ilang mga hiwing binuhatan sumala pa sa usa ka inilang kolumnista sa Philippine Star.
Atol sa gihimong forum nga gipasiugdahan sa The Freeman nga may temang “Government and Media in a World with No Wang-wang” nga nagtuki sa government transparency ug kung asa kutob ang media sa pagkuha og impormasyon sa gobiyerno isip news sources.
Ang maong forum gitambongan sa mga sakop sa media ug mga estudyante sa nagkadaiyang tunghaan.
Ang speakers sa maong forum mao sila si Cito Beltran, columnist sa Philippine Star, corporate trainor/mentor; Minerva Newman, regional director sa Philippine Information Agency-7 ug Dale Mark Antonio, ang bise presidente sa Association of Government Information Officers-7.
Matud pa ni Beltran nga ang media isip magbalantay mosaway gyud sa mga binuang sa gobiyerno ug kini usab maoy hinungdan nga dili mosalig ang ubang ahensya sa gobiyerno sa media.
Kini bisan pa og gusto sa gobiyerno nga maayo ang ilang relasyon sa media. Gidasig hinuon ni Beltran ang mediamen sa pagdayeg usab kung adunay maayong nahimo sa gobiyerno aron sa ingon masayon usab ang pagkuha og impormasyon gikan kanila.
Si Newman sa iyang bahin nagkanayon nga walay problema ang gobiyerno sa mga media tungod kay giisip nila kining mga propesyonal.
Ang partner sa The Freeman sa pagpahigayon sa maong forum mao ang Visayan Electric Company ug ang Cebu City Marriott Hotel. (BANAT NEWS)