CEBU, Philippines - Namatay diha-diha ang usa ka lalaki human kini pusila sa wala hiilhing kriminal didto sa Unit 3 sa merkado sa Carbon sa barangay Ermita ning dakbayan sa Sugbo kagahapon sa udto. Ang biktima giila lang sa kapolisan sa ngalang Tagalog nga taga Ermita kansang bagol-bagol nabuslot sa tulo ka mga bala sa armas de fuego. Nasayran sa Banat News nga naglingkod lang sa hagdan sa merkado ang biktima dihang kalit lamang kining giduol sa kriminal ug gidul-itan ang ulo sa armas.
Nakurat ang mga saksi dihang nabati nila ang tulo ka nagsunod-sunod nga mga buto sa armas de fuego.
Human sa maong mga buto mibay-ad sa baldosa ang biktima nga naglunang sa kaugalingon niyang dugo ug nabugtoan diha-diha dayon sa kinabuhi. Samtang ang kriminal dali ra usab kaayong milighot sa daghang tawo ug nawagtang kini nga walay nakaila.
Padayon pang gipangita sa kapolisan ang maong killer. (BANAT NEWS)