CEBU, Philippines - Usa ka sakop sa Philippine Air Force (PAF) uban sa lain pang duha ka babaye gitulis didto sa A. S. Fortuna Street, barangay Banilad, dakbayan sa Mandaue, kagahapon sa buntag.
Ang biktima mao si Rufo Bokog Jr., 29, sakop sa PAF nga nagbase sa Mactan Air Base, samtang ang duha niini ka higala mao sila si Jesusa Japon, 30, taga A. Fortuna Street ug Ann Pocong, 29, taga Maguikay, pulos sa dakbayan sa Mandaue.
Usa sa duha ka tulisan nga nasakay og usa ka motorsiklo mao si Kimwell Albo kinsa maoy angkas ug wala magsul-ob og helmet sa ilang pagpanulis.
Si Albo nailhan sa mga biktima sulod sa rogue gallery sa kapolisan sa dakbayan sa Mandaue.
Base sa imbestigasyon sa kapolisan nga ang tulo ka mga biktima nanglingkod sa usa ka lingkuranan samtang naghisgot sila sa ilang negosyo. Dihang kalit lang mihunong sa ilang kilid ang usa ka motorsiklo nga gisakyan sa duha ka tawo ug pagkanaog sa angkas niini gitionan sa armas ug mideklarar nga tulis.
Gumikan sa kabalaka nga pamusilon sila, gitunol nalang sa mga biktima ang ilang mga alahas ug salapi.
Nasakiyo sa mga tulisan gikan sa tulo ka mga biktima ang Sonny laptop nagkantidad og P40 mil, Samsung cell phone, P10 mil, duha ka Nokia cell phone, P6 mil, duha ka pitaka nga may cash nga P5 mil, gold nga kwentas, P11 mil, Seiko nga relo, P5 mil, ID, lisensiya sa armas, ATM cards lakip na ang mga dokumento sa armas.
Ang kapolisan mipahigayon dayon og hot pursuit operation batok sa maong mga tulisan. (WC)(BANAT NEWS)