CEBU, Philippines - Usa ka kawani sa kagamhanan sa dakbayan sa Talisay kinsa gipasanginlang mi-undertime sa iyang Daily Time Record (DTR) apan mi-claim og 8 oras nga suweldo, mibahad nga wala siya mahadlok sa imbistigasyon.
Matud pa ni Alexander Gabi nga wala siyay kabalaka ug kalisang nga moatubang sa mga imbistigador sa Ombudsman Visayas diin tua isang-at ang maong kiha.
Ang kihante ni Gabi mao si Kapitan Fe Ylanan sa barangay Linao sa maong dakbayan kinsa mipresentar ngadto sa buhatan sa Ombudsman sa DTR ni Gabi nga maoy silbi niyang ebidensya sa panikas ni Gabi.
Matud pa ni Ylanan nga base sa DTR ni Gabi niadtong Hulyo 25, 27 ug 29 ning tuiga , wala makaabot og walo ka oras ang trabaho sa naulahi , apan matud pa , gikuwenta ni Gabi og walo ka oras, ang iyang trabaho ug ang iyang DTR may pirma usab ni Konsehal Dennis Basillote nga labing nagpamatuod nga tinuod ang napatik sa DTR sukwahi sa gipahayag ni Gabi.
Kini tungod kay ang DTR ni Gabi nagbutyag nga sa Hulyo 25, 2011, mi-out siya sa alas 3:00 sa hapon; Hulyo 27, 2011 alas 2:00 sa hapon; ug sa Hulyo 29, alas 10:00 sa buntag siya migawas.
Matud pa ni Ylanan nga ang pag-undertime ni Gabi gikan sa iyang trabaho sa maong mga adlaw, personal ang hinungdan ug dili opisyal nga transaction tungod kay miadto kini sa iyang (Ylanan) buhatan.
Apan matud pa ni Ylanan nga luyo ning maong mga kamatuoran nga wala makaabot og tag-walo ka oras ang trabaho ni Gabi sa nahisgutang mga adlaw, gi –claim kini sa naulahi nga tag-walo ka oras ang iyang natrabahoan sa maong mga petsa. Usa sa hinungdan nga natuki ni Ylanan ang kaso ni Gabi mao ang giingong kaso niini sa paglapas sa usa ka resolution sa barangay, nga siya mismo si Ylanan maoy nag-imbistigar.(WC) (BANATNEWS)