CEBU, Philippines - Mokabat sa P2.5 milyones nga kantidad ang gibanabanang danyos sa nasunog nga pabrika sa katol alas 10:15 ang takna sa miaging gabii nga milanat og 30-minutos una pa makontrolar.
Si SFO4 Roy Garcia, imbestigador sa Bureau of Fire Protection (BFP) sa dakbayan sa Mandaue miingon nga ang nasunog mao ang Philcoil Industries Incorporated nga gipanag-iya sa magpapatigayon nga si Ramon Dacay.
Matud pa ni Garcia nagsugod ang kalayo sa sulod sa bodega sa maong pabrika nga maoy gibutangan sa sinakong mga bagol ug uban pa nga galamiton alang sa paghimo og katol.
Dugang pa ni Garcia si Mandaue City Fire Marshall Rogelio Bongabong dali nga mipaubos sa alarma ngadto sa Task Force Alpha sa maong sunog tungod sa kadako sa kalayo.
Ang mga silingang kabomberohan nga miresponde mao ang lungsod sa Consolacion, dakbayan sa Lapulapu ug dakbayan sa Sugbo.
Padayon pang giimbestigar kung unsay sinugdanan sa kalayo ug ang kinatibuk-ang danyos. Wala say nasakitan sa maong hitabo. - BANAT NEWS