CEBU, Philippines - Ang pagpamutang og mga stickers sa mga habal-habal nga namasahero sa mga hilit nga kabarangayan sa dakbayan maoy gihimong paagi sa Mandaue City Police Office (MCPO) alang sa pagsumpo sa grupo sa dautang elemento nga mogamit og motorsiklo sa ilang paghimo sa krimen.
Si Chief Inspector Milven de Paz, hepe sa Criminal Intelligene and Investigation Bureau (CIIB) sa Mandaue City Police Office (MCPO) miingon nga dako ang papel sa mga habal-habal alang sa transportasyon sa hilit nga kabarangayan.
Apan naghinobra usab ang gidaghanon niini ug ang uban gigamit na sa paghimo og krimen sama sa pagpanulis, pagpanglabni, pagpatay ug uban pa.
Matud pa ni De Paz nga tungod niini maoy ilang gihimo ang pagsuhid sa mga dapit sa dakbayan nga nag-parking ang mga habal-habal pinaagi sa pagbutang og mga stickers ug pagpangayo usab og tabang sa mga drayber niini.
Gipasabot ni De Paz nga ang stickers nga ilang gibutang sa mga habalhabal maoy ilhanan sa publiko kini mga lehitimong motorsiklong pasaheroan.
Kadtong walay stickers nga magdagan-dagan sa kabukiran mahimong ipahibalo dayon nila ngadto sa kapolisan aron masusi. (BANAT NEWS)