CEBU, Philippines - Giawhag ni Konsehal Edgardo Labella ang Department of Education (DepEd) nga isal-ot unya sa curriculum ubos sa subject nga Physical Education (P.E.) ang “self-defense” gumikan kay iyang nabantayan nga kasagaran karon sa mabiktima sa mga tulis mao ang mga kabatan-onan.
Sa usa ka resolusyon nga iyang giumol kalabot niini, si Labella nagkanayon nga angayang tudloan daan og self-defense ang mga tinun-an sa elementarya ngadto sa high school sa pampubliko ug pribadong tulunghaan.
Matud pa niya nga base sa talaan sa tuig 2006 ngadto sa 2010, 70% sa biktima sa tulis nagpangedaron og 15 ngadto 25 anyos kinsa kasagaran niini nagtrabaho sa mga call center nga kaadlawon na manguli sa balay.
Nalatid sa 1987 Constitution kalabot sa dakong papel sa mga kabatan-onan sa pagpalambo sa nasud busa angayan kining hatagan og tukmang proteksyon sa gobyerno.
Giingon nga ang tunghaan maoy training ground sa kabatan-onan busa angayan lang silang tudloan kung unsaon pagpanalipod sa ilang kaugalingon kung makasugat sila og dautang elemento.
“The State has the authority and duty to look after the welfare of its youth and foster its development for civic efficiency and development of character,” tipik sa resolusyon ni Labella nga tukion karong Miyerkules alang sa regular nga sesyon sa konseho.
Midugang si Labella nga iyang padad-an og kopya sa maong resulosyon ang kalihim sa DepEd nga si Bro. Armin Luistro ingon man usab ang tsirman sa Committee on Education sa Senado nga si Senador Edgardo Angara. (WC)(BANAT NEWS)