CEBU, Philippines - sa ka 68-anyos nga Australian national ang gibalhog sa karsel human kini masakpi sa polis nga nagdala og mga pinaugang dahon sa marijuana diha mismo atol sa iyang pagbisita sa duha ka mga pinirisong babaye diha sa Argao Police Station niadtong Sabado sa gabii.
Ang suspetsado mao si Gary Frank Brough, nagpuyo diha sa barangay Langtad, Argao human naimbargohan ni PO1 Renato Nacaytuna og usa ka kumkom nga pinaugang dahon sa marijuana nga gisulod og puting plastik.
Si Nacaytuna nga nahinabi sa Banat News kagahapon mibutyag nga pasado alas 8:00 sa gabii niadtong Sabado mianha sa police station si Brough tungod kay buot kining mobisita sa iyang mga higala nga mao ang magsuong Love-Love ug Mary Ann Camoling mga residente sa barangay Langtad, Argao ug parehong napriso tungod sa kasong theft.
Matud ni Nacaytuna nga ang oras nga gitugot nila sa pagbisita sa mga nadetiner diha sa ilang police station gikan sa alas 8:00 sa buntag hangtud lang sa alas 5:00 sa hapon hinungdan nga gisita niya si Brough ug gisultihan sa oras sa pagbisita.
Apan matud ni Nacaytuna nga ang maong langyaw miinsister gyud ug namugos nga mobisita sa duha ka babaye tungod kay duna siya’y ihatag.
Dihang gipangutana kini sa maong polis kung unsay ihatag ngadto sa duha ka babaye mitubag lang kini og “something.”
Si Nacaytuna ug Brough nagkalalis diin nabantayan sa nahisgutang polis nga dunay migimaw nga plastik sa tuong bulsa sa short pants sa suspetsado.
Gisita ni Nacaytuna si Brough kung unsay sulod sa plastik nga naa sa iyang bulsa ug giingong mitubag lang ang maong Australyano og “no, no, no.” Gimanduan sa polis si Brough nga ipakuha ang maong plastik gikan bulsa niini ug dihang iyaha kining gipagawas ug gibutang ibabaw sa lamesa nasuta nga marijuana diay ang sulod niini.
Matud usab niya nga gisultihan niya si Brough nga duna kini nahimong kalapasan tungod sa paghupot niini og marijuana hinungdan nga ilaha kining gipugngang makauli ug gitawgan ang iyang asawa nga paanhaon sa police station.
Dihang naabot ang asawa subling girekisa si Brough atubangan sa iyang asawa ug nakuhaan kini pag-usab og laing pinutos nga marijuana sa mao gihapong bulsa.
Si Nacaytuna nagkanayon nga karong adlawa gikatakda nilang tawagan ang embahada sa Australia aron ma-report ang nahimong kalapasan ni Brough nganhi sa nasud ug pasakaan usab kini og kaso karong adlawa. (EIM) (BANAT NEWS)