CEBU, Philippines - Napakyas ang suway pagpanulis sa duha ka mga armadong tulisan human wala nila damhang armado ang drayber sa trak sa Coca Cola Bottlers Philippines nga ilaha untang tulison diha sa Countryside barangay Lipata sa lungsod sa Minglanilla niadtong Biyernes sa alas 3:30 sa hapon.
Apan naangol ang kolektor nga si Junjun Marcos, 30, kasamtangang nagpuyo sa Poblacion siyudad sa Talisay ug lumad nga taga Negros lakip na ang drayber niini nga si James Morello, 39,molopyo sa Lawaan-2 dakbayan sa Talisay.
Samtang gisubay na sa kapolisan ang mga tambalanan tungod kay giingong ang usa sa mga tulisan napusilan sa drayber nga si Morello.
Ang mga tulisan sakay og motorsiklong kolor blue nga pulos nagsuot og helmet kinsa napakyas pagdala sa kinitaan sa maong kompanya.
Matud ni PO2 Wendyl Aranez, desk officer sa Minglanilla Police Station dihang nahinabi sa Banat News naghatud og mga softdrinks sa ilang mga suki ang mga biktima diha sa maong lugar.
Giingong mikanaog si Morello aron pagkuha sa bayad sa ilang suki nga tindahan ug nahabilin sa trak ang kolektor apan kalit nga miabot ang mga tulisan dayong pasalba sa armas paghunong sa tungod sa trak.
Tungod sa pagpasalba nakabantay si Morello ug mibalik sa trak ug giingong may dala nang wala matinong kalibre sa armas dayong pusil sa usa sa mga tulisan nga giingong nagsuot og kolor puti ug kini gituohang naigo sa abaga.
Tungod kay nakalitan mipasalipod ang mga tulisan sa pikas bahin sa trak hinungdan nga nakahigayon og ambak gikan sa trak ug midagan palayo si Marcos.
Apan pag-abot niya sa unahan mibalik kini sa trak tungod kay nabiyaan niya ang bag nga gisudlan sa kwarta nga ilang koleksiyon apan gisugat sa laing suspek nga nagsuot kolor green nga sinina dayong pusil kaniya.
Si Marcos naigo sa tiyan dayung sibat sa duha ka tulisan sakay sa ilang motorsiklo ug misirit palayo.
Samtang ang samaron nga biktima gidala usab sa iyang kauban sa South General Hospital ug sa paghimo ning balita padayun pang giatiman sa mga doktor.
Wala pa masayri kun nganong adunay dalang armas ang drayber niadtong tungora sanglit ang hepe ug imbestigador sa maong kaso mi-off duty na. - Darrel Carumba/EIM (FREEMAN)