CEBU, Philippines - Gitakdang mobisita dinhi sa lalawigan sa Sugbo ang Ambassador to the Philippines sa Estados Unidos nga si Harry Thomas Jr. aron pirmahan ang usa ka Memorandum of Agreement (MOA) tali sa mga opiyales sa lalawigan sa Sugbo kalabot sa pagpahingusog sa kampanya batok sa Human Trafficking (HT).
Matud pa ni Governor Gwendolyn Garcia ang maong MOA nga iyang pagapirmahan unya uban ni Tomas Jr. maoy pagpakita sa kagamhanan sa US sa dakong suporta niini sa iyang kawsa sa pagsumpo sa HT kon pagpangahente og tawo sa dili maayong trabaho nga mikuyanap na sa pipila ka mga kalungsoran sa lalawigan.
Gipahibawo sa gobernador nga gilakip niya sa maong MOA nga mopirma usab niini ang SK Federation President sa probinsiya sa Sugbo nga si Provincial Board member Aladin Caminero.
Kini tungod sa maong kampanya batok sa HT aktibong mupatuman niini mao na mismo ang mga kabataan. Dugang pa sa gobernadora nga ang mao usab nga kasabotan maoy pagpakita nga ang America misalig usab sa kampanya sa lalawigan sa Sugbo batok sa HT.
Ang HT maoy trabaho sa mga tawong mangahente ilabi na og babaye aron ilawog ngadto sa trabahoan nga ania sa nasud ug sa gawas nga makagusbat sa ilang maayong kaugmaon sama sa prostitusyon.
Lakip niini ang pagpamugaw kinsa mamaligya og babaye ngadto sa mga lalaking nagpangita og katagbawan sa ilang lawasnong kahinam. (BANAT NEWS)