CEBU, Philippines - Nangangkon ang usa sa unom ka mga nagpatuong sakop sa Interpol Commission nga nakatabang sila sa mga operasyon sa kapolisan sa dakbayan sa Lapulapu sa wala pa sila masikop sa mga sakop sa Airport Police Division ug Police Center for Aviation Security 7 sa Mactan Cebu International Airport.
Matud pa sa usa sa mga suspek nga si Joeribe Gallarde Comendador nga nahinabi sa Banat News kanunay silang motabang sa mga operasyon sa kapolisan sa dakbayan sa Lapulapu ug sa uban pang units sa kapolisan dinhi sa Sugbu.
Kasagaran sa ilang operasyon mao ang pag-abag sa checkpoint nga ipahigayon sa kapolisan ug ang pagsilbing escort sa mga mobisita sa Sugbu.
Mitug-an usab si Comendador nga nasayod usab ang iyang uyoan sa pag-agawan nga si Cebu Provincial Police Office Director Sr. Supt. Patrocinio Comendador sa ilang mga kalihukan.
Samtang si Lapulapu City Police Office Director Sr. Supt. Anthony Obenza mipadayag nga diha ra siya nasayod gikan sa iyang mga sakop nga moabag kanila sa mga checkpoints ang unom.
Subling giinsister ni Comendador legal ang ilang paghupot sa maong mga armas gumikan sa ilang nationwide scope sa mission order nga giluwatan sa ilang ulohang buhatan sa Army Reserve Command (ARESCOM) sa Los Baños, Laguna.
Nagpabilin pa gihapon sa detention cell sa buhatan sa kapolisan sa dakbayan sa Lapulapu ang mga suspek nga sila si Joeribe Comendador, Genaro Estoque, Edwin Adolacion, Julia Etorma (babae), Asher Asotique ug Tirso Pinaflor, mga sakop sa Interpol Commission human gipasaka sa PCAS 7 ang kasong Usurpation of Authority, Illegal Possession of Firearms and ammunitions ug illegal use of uniform. (BANAT NEWS)