CEBU, Philippines - Duha ka pulis ang nagpositibo sa paggamit og ilegal nga drugas human sa kinalit nga random drug test sa Cebu Provincial Police Office (CPPO) ug sa local government unit sa lungsod sa Asturias ug Tuburan.
Apan si Sr. Supt. Teofilo Siclot, Deputy Provincial Director for Operation (DPDO) sa CPPO nagdumili pagbutyag sa pangan sa maong pulis tungod kay ipaubos paman sa confirmatory test sa PNP Crime Laboratory.
“Dili pa gyud ta maka-confirm as of now kinahanglan pa man i-finalized,” sumala pa ni Seclot.
Si Jude Mendoza, sa Philippine National Police Crime Laboratory-7 kinsa maoy mipahigayon sa surprise random drug test mitug-an sa The FREEMAN igsuong mantalaan sa Banat News nga ang sample sa ihi sa pulis nga napositibo sa paggamit og ilegal nga drugas nasuta pinaagi sa drug testing kit.
Mosobra sa 30 ka empleyado sa munisipyo sa lungsod sa Asturias ug 21 ka mga pulis sa maong lungsod ang gipaubos sa random drug test.
Samtang sila si PO1 Jose Niño Villaceran ug PO1 Lolito Narvasa nasakpang wala magsul-ob sa ilang uniporme ug tag-as na og mga buhok atol sa rank inspections.
Aduna pay laing polis ning bag-ohay lang ang migawas nga positibo gihapon sa drug test sa Tuburan. (BANAT NEWS)