CEBU, Philippines - Duha ka mga lalaki ang naghikog sa barangay Duljo-Fatima ug sitio Katipunan, sa barangay Labangon ning dakbayan sa Sugbo sa miaging gabii.
Ang naghikog sa sulod sa ilang balay sa Duljo-Fatima mao si Sander Alcover, 25, ulitawo apan dunay kapuyo, usa ka electrician, samtang didto sa Katipunan, si Virgilio Ilagan, 22, ulitawo.
Ang duha pulos naghikot og pisi sa ilang liog nga maoy hinungdan sa pagkabugto sa ilang kinabuhi.
Si Alcover sa sayo pa gialarma sa kapolisan kay misaka kini sa atop sa ilang silingan samtang diha sa kalipong sa ginadiling drugas.
Apan pipila ka takna nadiskobrehan nalang ni Corazon Alcover, inahan sa naghikog nga nagbitay na sa pisi ang iyang anak sulod sa lawak niini
Samtang si Ilagan, giingong gipasanginlan nga nanghikap-hikap sa pribadong parte sa lawas sa manghod nga babaye sa iyang kapuyo hinungdan nga gisukmatan ug gipangutana siya sa iyang kapuyo ug milakaw kini.
Apan sa pagpauli niini sa ilang balay wala himatikdi sa kapuyo ug mao nalay nakita nianang pagkabuntag nga patay na kini pinaagi sa paggamit sa hikot sa manok nga maoy gituok sa iyang liog.
Ang duha nasuta sa kapolisan nga namatay nga walay foul play. - BANAT NEWS