CEBU, Philippines - Kritikal ang kahimtang sa usa ka 50 anyos nga lalaki human kini pusila sa tulo niya ka mga silingan sulod sa menteryohan sa Sitio Humayhumay, barangay Gun-ob, dakbayan sa Lapulapu kagahapon sa kadlawon.
Ang biktima mao si Danilo Patalinhug, 50 , ug residente sa maong dapit.
Samtang ang mga suspetsado mao sila si Marvin Dignos, Popoy Tumulak ug Gigi Tumulak nga pulos silingan sa biktima.
Sa pasiunang imbestigasyon sa kapolisan nasuta nga sa ala 1:00 kagahapon sa kaadlawon samtang nakig-inom ang biktima uban sa iyang mga higala kalit lang miabot ang tulo ka mga suspetsado ug sa walay daghang estorya usa niini ang miluthang sa biktima.
Mikabad og panagan ang mga barkada sa biktima samtang misibat usab dayon ang mga suspetsado human mahagba sa yuta ang biktima.
Mibalik ang mga barkada sa biktima ug maoy mihatod kaniya ngadto sa tambalanan sa Lapulapu apan gibalhin usab dayon kini ngadto sa Vicente Sotto Memorial Medical Center sa dakbayan sa Sugbo.
Padayon pang gipangita sa kapolisan ang mga suspetsado samtang nasuta niini nga panagdumot ang hinungdan sa maong pagpamusil. (BANAT NEWS)