CEBU, Philippines - Aduna na’y pipila ka mga establisamento karon nga nagsugod na og tukod sa ilang disaster brigade aron adunay makaresponde sa panahon sa emerhensya.
Sumala ni executive director Alvin Santillan sa Cebu City Risk Reduction and Management Council (CCRRMC) nga may upat na ka mga dagkong tindahan sa siyudad nga mituman sa sugyot ni Mayor Michael Rama ug sa konseho kalabot sa kamahinungdanon sa pagbaton nila og disaster brigade alang sa ilang kompanya.
Sumala pa ni Santillan nga dako kaayo og ikatabang ang maong grupo sa matag kompaniya alang sa dugang puwersa nga gikinahanglan niini sa pagtubag kung adunay mga dagkong trahedya sama sa linog ug sunog nga mahitabo sa ilang establisamento.
Samtang ang CCRRMC mipasalig nga sila usab ang moumol sa mga training kung adunay mga establisamento nga makaporma na og grupo alang sa ilang disaster brigade.
Pipila na sa ilang napahigayonan sa pagbansay-bansay mao ang nagkadaiyang eskuwelahan kinsa may mga tinun-an ang migahin og oras sa pagpahimus niini. - BANAT NEWS