CEBU, Philippines - Duha ka mga lalaki ang namatay human ang ilang motorsiklong gisakyan misampak sa laing sakyanan nga giparking sa daplin sa dalan tungod kay nagpabulkit sa ligid diha sa dalan M.C. Briones sa barangay Ibabao, dakbayan sa Mandaue alas-9 pasado ang takna sa miaging gabii.
Ang namatay mao si Jenever Gamay, taga sitio Cambiohan sa barangay Casili sa lungsod sa Consolacion samtang padayon pang giila sa kapolisan ang kauban niining lalaki nga nakalas usab.
Nabangga kini sa ‘Tora-Tora’ kon motorsiko nga dunay sidecar nga kargahan og baboy nga gipanag-iya ni Lee Pepalin sa General Maxilom, dakbayan sa Sugbo.
Si PO2 Melvin Llones sa traffic division sa Mandaue City Police Office (MCPO) miingon nga kusog nga nagdagan subay sa maong dalan paingon sa lungsod sa Consolacion ang motorsiklo nga giluwanan sa mga biktima.
Gituohang wala makabantay ang duha nga adunay giparking nga sakyanan sa ilang agianan maong maayong pagkasampak sa duha nga niadtong tungura gidudahang kusog kaayo ang dagan.
Matud pa ni Llones nga grabe ang kadaut nga naangkon sa kalawasan sa duha ug daling gikarga sa ambulansiya sa mga sakop sa Accident Control and Emergency Response Team (ACERT) ug gidala sa tambalanan apan gideklarar kini sa mga doktor nga dead on arrival. Si Llones miingon nga sa pakisusi nga iyang gihimo iyang nasuta nga nahiyosan sa iyang ligid ang maong nadasmagan sa duha hinungdan nga gi-parking kini sa daplin sa karsada tungod sa vulcanizing shop sa maong dapit.