CEBU, Philippines - Giharos sa Banat News ang upat ka major categories nga gihatag sa bag-ohay lang nga Cebu Archdiocesan Mass Media Awards (Camma) 2011 nga gipahigayon sa milabay nga gabii sa SM City.
Sa unom ka kategorya sa Cebuano Newspaper Category, upat niini ang nakuha sa Banat
News. Ang duha sa maong major categories ikatulong higayon nang naangkon sa Banat News sukad sa 2007, 2009 ug karong 2011.
Ang mga personalidad sa Banat News nga gipasidunggan naglangkob nila ni Ma. Eleanor Valeros sa Best in Feature Writing (Tingusbawan); Rey Pasaporte sa Best in News Writing ug Best in Special Reports (Investigative Reports) ug Ramesh Rosillo alang sa Best in Editorial Cartooning.
Ang news writing ug ang investigative reporting sa Banat News maoy nag-unang pangkabig niini sa mga bumabasa sukad pa kaniadto isip usa ka tabloid nga ang nag-unang gibaligya mao ang balita ug impormasyon.
Nakuha usab sa igsuong pamantalaan sa Banat News nga The Freeman ang Best in Column Writing pinaagi ni Fr. Roy Cimagala sa English newspaper category.
Samtang ang laing binisayang tabloid nga Sun Star Super Balita nakaangkon sa Best in Editorial Writing ug Best in Column Writing alang kang Ernesto Lariosa.
Ang ubang mga mananaug sa nagkadaiyang kategoriya naglangkob nila ni Justin K. Vestil sa Sun Star (News Writing), Luis Quibranza III sa Sun Star (Best in Feature Writing); Cherry Ann T. Lim sa Sun Star (Best Investigative Report ),.Nakuha usab sa Sun Star ang Best in Editorial Cartoon ug Best in Editorial Writing.
Ang programang “Kabilin”, sa Sugbo TV maoy Best TV Magazine Show, ug ang Sinulog Foundation nakadaug usab isip Best Institutional Website.
Nagmaya usab ang Cable channel nga RCTV Cebu human ang programa nila nga “Real Life” ni Alexis Yap maoy napili nga Best Talk Show.
Nakadawat usab og special citation sa CAMMA ang programang “Isyu Karon” sa GMA-7 Cebu. Gipasidunggan usab ang nagkadaiyang programa sa radyo sama sa DYHP kung diin nakuha niini ang Best Radio Plugs or Public Service Announcement, Best Educational Program, Best News Program ug Best Drama.
Ang DYAB nakahipos usab og Best Talk Show ug Best Commentary, samtang ang kakompetensiya niini nga DYSS maoy nakasungkit sa Best Public Affairs Program ug ang DYRC mikuha sa Best Open Communication Program.
Sa natad usab sa telebisyon , ang ABS-CBN milangkat sa Best TV Plug, Best TV Specials/Feature alang sa “Halad sa Kapamilya”; Best Entertainment Variety Program alang sa “Kapamilya Mas Winner Ka”; ug Best TV News Program alang sa “TV Patrol Central Visayas.” - (BANAT NEWS)