CEBU, Philippines - Si 6th district Congressman Gabriel Luis Luigi Quisumbing nanawagan sa nasudnong kagamhanan sa paglusad og mas lapad nga job creation program aron mas daghan ang makatrabaho ilabi na sa mga batan-on.
Gawas niini si Quisumbing mihangyo usab og dugang kapanginabuhian alang niadtong mga nawad-an og trabaho niining kasamtangang administrasyon pinaagi sa pagpatuman sa mga mahinungdanong infrastructure project alang sa kauswagan sa ekonomiya sa nasud.
Matud pa ni Quisumbing nga ang national government gikinahanglang motubag sa importanteng isyu kalabot sa health care, housing ,education, environment and peace and order aron ang mga tawo mahimong produktibo sa natad sa nagkalainlaing matang sa panginabuhi nga alang sa kauswagan sa ilang pagpuyo ug sa nasud.
Matud pa sa kongresista sa ika-unom nga distrito nga kun mahimo kini sa nasudnong kagamhanan ang katawhan sayon ra kaayong mahimong kaabag sa gobiyerno alang sa nation-building o paglambo sa Pilipinias.
Hinuon gitataw ni Quisumbing nga ang Ubos Balay balaoranan dako og pagsalig kang Presidente Aquino nga mopatuman sa mga mahinungdanong programa nga makapalambo sa pagpuyo ug panginabuhi sa tanang mga Pilipino pinaagi sa pagpatuman sa limpyo ug dili kurap nga pangagamhanan. (WC) (BANATNEWS)