CEBU, Philippines - Apektado ang mga kabus ilabina kadtong mga molupyo sa bukirang bahin sa lalawigan sa direktiba nga giluwatan sa Department of Interior and Local Government (DILG)-7 nga nagdili na sa mga local nga kagamhanan pagpagamit sa mga dumptruck nga pasakyan og mga tawo.
Kini human malimbuwad ang usa ka dumptruck sa lungsod sa Barili nga gisakyan sa lungon sa minatay ug sa mga nanghatod niini niadtong Huwebes nga sa maong hitabo, namatyan og 10 ka tawo, samtang naangolan usab og laing 50 ka tawo.
Si Mayor Teresito Mariñas sa Barili mibutyag sa Banat News nga wala silay mahimo gawas sa pagsanong sa giluwatang derektiba sa DILG.
Apan iyang gipasabot nga ang mga kabus nga molupyo sa bukid maoy apektohan niini gumikan sa kalayo sa ilang lugar paingon sa lungsod.
Hinuon mahitabo lang nga mohangyo ang mga molupyo sa bukid nga mogamit og dump truck sa panahon nga maglubong sila og minatay.
Gipadayag sa mayor nga pangitaan niya og paagi nga makapadayon sa maong serbisyo nga dili usab makalapas sa direktiba sa DILG.
Gani ang nahuna-hunaan karon sa mayor mao ang pagpahimangno sa taga bukid nga mamatyan nga maglakaw nalang ug bayongan ang ilang lungon ngadto sa menteryohan.
Apan kun gikinahanglan gyud silang mosakay dili na dumptruck ang ipagamit sa mayor kundi ang ilang sakyanan nga aircondition aron dili kaayo singoton ug kapuyon ang maghatod og lubong.
Matud sa mayor nga adunay lugar sa ilang lungsod ang gikinahanglan pa nga maglakaw og 8 ngadto sa 10 kilometros ang distansya ngadto sa menteryo busa nabatasan na nila nga mosakay kini og de karga nga iyan sa kagamhanan sa lungsod. Karong gidili na sa DILG, miingon si Mariñas nga pangitaan niya og paagi nga masulbad ang maong problema.(WC) (BANATNEWS)