CEBU, Philippines - Mga suspetsadong pusher sa barangay Balud, lungsod sa Dalaguete giingong mga gun-for-hire usab matud ni PO3 Reynaldo Solante sa Provincial Intelligence Branch.
Si Solante mibutyag nga tulo sa upat ka mga suspetsadong pusher lakip na si Joseph Gañolon, 27, taga barangay Nalhubsa nahisgutang lungsod kinsa napatay sa nahitabong pinusilay giingong mga gun -for-hire usab.
Si Joseph ang giingong suspetsado sa ubang mga insidente sa pagpamusil sa habagatang bahin sa Sugbo apan ang pamilya sa giingong mga nabiktima sa suspetsado wala mopasaka og kaso batok kaniya.
Base sa report nga nadawat sa kapolisan nga ang magsuong Gañolon maoy mga suspetsado sa pagpatay kang Victoriano Torino, 53, taga barangay Poblacion, lungsod sa Badian, drayber sa V-hire kinsa gibanhigan niadtong Agosto 9, 2011 sa lungsod sa Alcantara.
Si Wilberto Timplado, 26, taga barangay Bala, lungsod sa Moalboal, pasahero ni Torino naangol sa maong pagpamanhig.
Si Loriano Heredia ug Brian Carali, 23, nga apil sa nangadakpan lakip sa pasakaan og kaso. Matud ni Solante nga si Carali ang unang namusil ngadto kanila dihang nakabantay sa ilang presensiya.
Apan swerte kay wala’ y naigo sa mga polis ug mibawos og pabuto ngadto sa mga suspetsado nga miresulta sa pagkamatay ni Joseph ug pagkaangol ni Jojo.
Atol sa gipahigayong imbestigasyon sa mga suspetsado si Jojo ang manghud ni Joseph kinsa mao gyu’y subject sa operasyon sa kapolisan nangangkon nga ang iyang igsuon ang giingong dunay kontak sa ubang mga pusher.
Tulo ka mga dagkong pakete, duha ka medium nga pakete ug 36 ka sachet nga shabu nga mokabat tanan ngadto sa P120 mil, drug paraphernalia, tulo ka .357 revolver, usa ka kalibre. 45 nga pistola, mga bala, mga resibo sa money transfer, P2,000 nga kwarta, usa ka granada ug tulo ka mga notebook nga dunay listahan sa mga kolektahonon ang na-recover gikan sa balay.
Si Solante nagkanayon nga ang nahisgutang notebook magamit nila sa pagsubay sa uban pang mga pushers nga dunay transaksiyon sa mga suspetsado.
Ang mga suspetsado gikatakdang pasakaan og kaso sa nahimo nilang kalapasan karong adlawa diha sa Provincial Prosecutor’s Office. - BANAT NEWS