CEBU, Philippines - Gipahinumduman sa pangulo sa City's Hospitalization Assistance and Medicines Program (CHAMP) nga si Henry Sanchez ang publiko nga buot makabenepisyo sa hinabang pinansyal sa dakbayan nga kompletuhon gyud ang ilang mga dokumento pagtubag.
Kini human adunay mga reklamo ang mi-avail niini nga gibalik ang ilang mga endorsement letters human nila masumiter. Ang hinabang pinansyal nagkantidad og P5,000 alang sa tambal ug P25 mil alang sa hospitalization alang sa mga kabus nga maospital sa pang-publikong tambalanan.
Matud pang Sanchez nga kinahanglang kompleto ug sakto ang nakabutang sa mga isumiter nga dokumento aron dili masangit sa Commission on Audit.
Sagad sa nakitang hinungdan nga gibalik ang mga endorsements mao ang wala pagbutang kung unsay relasyon sa mi-file ngadto sa pasyente. Gihimakak usab ni Sanchez ang report nga ang hinungdan nganong gibalik ang endorsement kay mga barangay konsehal ra maoy mipirma. Matud pa niya ang mga opisyales sa barangay gitugotan niini basta residente gyud sa siyudad ang pasyente.
“Modawat man, seguro maong nabalik to ang ilang letter kay wala nila gidetalye pag-ayo sa suwat kung unsa ang ilang relasyon sa pasyente,” sumala pa ni Sanchez. - BANAT NEWS