CEBU, Philippines - Ang mga tinun-an sa Mandaue City College (MCC) sa Tipolo campus nga migradwar sa kurso nga education mahimong makakuha og eksamin sa Licensing Examination for Teachers (LET) sa Philippine Regulatory Commission (PRC) kun makakuha kini og 18 ka unit sa maong kurso sa laing tulunghaan.
Kini maoy gipadayag ni PRC legal officer Mildred Antepuesto nga nahinabi sa mga tigbalita.
Matud pa niya nga mahimo na nilang dawaton ang maong mga tinun-an kun makapakita kini og kamatuoran nga nakakuha sila og 18 ka unit sa education course sa laing tulunghaan gawas sa MCC Tipolo campus nga gidumala sa presidente nga si Dr. Paulus Marie Cañete.
Gitataw niya nga nahimo karong dakong babag sa pagkuha og eksamin sa maong mga tinun-an kay giisip mang ilegal ang operasyon sa maong eskuylahan gumikan kay wala kini permiso gikan sa CHED 7.
Si Antepuesto miingon nga ang MCC sa Mandaue City Sports Complex nga gidumala ni Dr. Susana Cabahug mao lamang ang bugtong MCC nga ilang giila sanglit aduna man kini authority to operate nga giluwatan sa CHED 7.
Samtang si Cañete nga nahinabi sa Banat News miingon nga gihimo niya ang tanang pamaagi aron unta tugotan sa PRC 7 ang iyang mga tinun-an sa pagkuha og eksamin karong sunod bulan.
Dugang pa niya nga nagpadala na siya og sulat sa PRC ug iyang gipaabot ang tubag niini.
Si Cañete miingon nga modangop siya sa ubang mga dagkong opisyal dinhi sa Sugbo pamasin nga matabangan siya ning maong suliran kay kaugmaon sa mga tinun-an maoy nakataya niini. Si Regal Oliva nga maoy nangulo sa city treasurer’s office sa dakbayan sa Mandaue miingon nga ilang paninglan ang MCC Tipolo campus og dakong buhis tungod kay nag-operate kini nga walay business permit ug mayor’s permit. - BANAT NEWS