CEBU, Philippines - Napisat ug namatay diha dayon ang usa ka trabahante sa Oriental Port Allied Services Corporation (OPASCOR) human kini madat-ugi og 40- footer container van sa usa ka barkong midunggo sa Cebu International Port (CIP) kagahapon sa kaadlawon.
Ang biktima mao si Jerry Bolivar, residente sa barangay Pasil dakbayan sa Sugbu. Samtang ang responsable sa maong hitabo mao si Renato Garcia, residente sa San Roque dakbayan sa Sugbu nga iyaha rang kauban sa OPASCOR ug operator sa crane.
Matud pa ni Sr. Insp. Joselito Blazo ang PNP Maritime-7 Station Chief nga 5:20 kagahapon sa kaadlawon nila nadawat ang report nga adunay nadisgrasya sulod sa usa ka barko nga midunggo sa CIP Complex.
Sa pagresponde sa kapolisan sa CIP ilang nakita ang patay’ng lawas ni Bolivar nga napisat na human kini madat-ugi og usa ka container van sulod sa M/V Mel Saujana nga midungo sa Bay 21 sa CIP.
Base sa pasiunang imbestigasyon nasuta nga didto natulog ibabaw sa usa ka container van si Bolivar ug wala makamatikod si Garcia nga dunay tawo nga naghigda sa maong van.
Adunay kaubang tiggiya si Garcia sa pagpahimutang sa mga container vans apan wala usab kini makabantay nga adunay tawong natulog sa ibabaw sa container van nga ilang patungan sa gidala sa crane.
Diha nalang nila kini mabantayi dihang aduna nay mipig-it ug dihang ilang gisusi ilaha diay kining kauban kinsa nakaangkon og daghang bali sa kalawasan ug patay na pag-abot sa tambalanan.
Mitahan usab dayon si Garcia ngadto sa mga awtoridad ug nabalaka sa iyang nahimong krimen nga wala niya tuyoa.
Ang maong kaso gipasa na ngadto sa Homicide Section sa kapolisan sa dakbayan sa Sugbu. (EIM) (BANAT)