CEBU, Philippines - Patay’ng lawas sa usa ka babayeng masahista nga gibaatan ang lawas ug gilubong duol sa kawayanan sa usa sa mga lugar sa barangay Agsungot ning siyudad kagahapon sa alas-10 sa buntag.
Ang patay’ng lawas nailhan nga mao si Maricris Villadolid, 24, kinsa nadiskubrehan sa iyang kapuyong si Richard Taburnal.
“Initiative sa kapuyo nga iyang kawoton ang iyang nadiskobrehang yuta nga bag-ong tinabon duol sa kawayanan dili layo sa ilang gipuy-an sa sitio Jubao,” matud pang PO2 Julius Regis sa Homicide Section sa Cebu City Police Office (CCPO).
Matud ni Regis ang duha ka bukton sa biktima gibaatan og pisi ug gibinaklid ingon man ang tiil niini lakip sa gibaatan ug aduna kini bun-og sa kalawasan samtang ang iyang uniporme sa trabahoan maoy gibaat ngadto sa iyang nawong.
Ang biktima nagtrabaho isip therapist sa usa ka spa sa barangay Banilad ug kasagarang gabii na kung mouli sa ilang pinuy-anan matud pang Regis.
“Hapit na tungang gabii siya kasagaran maabot kay 10 p.m. na iyang out sa trabaho kay magpaabot sa iyang kauban”, nagkanayon si Regis.
Ang kapuyo sa biktima mitug-an sa kapulisan nga niadto pang Sabado kini wala na makauli ug nianang Domingo sa buntag iyang gipa-blotter sa Talamban Police Station nga na-missing kini.
Matud ni Regis nga si Taburnal dunay pagduda nga ang iyang kapuyo posibling gipanamastamasan ug gilabay ra duol sa kawayanan nga maagian padulong sa ilang balay hinungdan nga namasin siya pagpangita niini sa maong dapit.
Sumala pa adunay nakit-an si Taburnal nga bag-ong kinawot nga yuta nga gitabon pagbalik hinungdan nga nagpatabang siya sa iyang mga silingan aron kini kawoton ug mao nalay ilang nadiskubrehan ang patay na niyang kapuyo.
Apan si Taburnal dunay pagduda nga ang iyang ig-agaw nga si Arnel Padillo maoy mihimo niini sanglit niadtong Sabado iyaha kining gibalibaran dihang gibaligyaan siya niini og kopras.
Iyaha hinuong gisultihan si Padillo nga ini’g kagabii nalang pag-abot sa biktima sanglit sweldo niini. Nagduda siyang giatangan ug gitulis sa suspek ang biktima ug gipatay.
Si Padillo wala na igkita diha sa pinuy-anan niini, apan si Regis miingon nga sa pagkakaron ilahang gikunsiderar ang pamahayag ni Taburnal apan wala pa silay ebidensyang magkonektar kang Padillo sa krimen. (EIM) (BANATNEWS)