CEBU, Philippines - Nasikop sa mga sakop sa Provincial Intelligence Branch (PIB) ang giingong lider sa notadong robbery group sa Mindanao pasado alas-2 sa kaadlawon kagahapon sa barangay Sudlonon syudad sa Bogo.
Ang nasikop nailhan nga si Leonardo Tabasan, lumad nga molupyo sa Cagayan de Oro kinsa kanhi sakop sa Philippine Army kinsa adunay warrant of arrest diha sa sala ni RTC 3rd Judicial Region Branch 47 Judge Edgar Chua sa San Fernando, Pampanga tungod sa kasong illegal possession of firearms.
Sa pakighinabi sa Banat News ni PO3 Reynaldo Solante sa PIB misaysay kini nga nakadawat sila’g impormasyon kalabot sa presensya sa maong lider sa notorious nga robbery group nga anaa sa siyudad sa Bogo.
Tuod man sulod sa usa ka semanang pagpangita kang Tabasan natultulan nila kini sa giabangang balay diha sa dakbayan sa Bogo.
Nakuha gikan sa wallet ni Tabasan ang upat ka medium packs nga may sulod nga gituohang shabu samtang nakuha usab sa iyang panimalay ang usa ka granada ug armas nga kalibre .45 nga adunay pito ka buhing bala.
Midugang si Solante nga base sa ilang nakuhang impormasyon upat na ka buwan nga nagpuyo si Tabasan sa maong panimalay. Dugang pa niya nga posibleng magpunay og balhin-balhin og pinuy-anan si Tabasan.
Si Tabasan dihang gikuhaan og habig kabahin sa mga alegasyon sa kapolisan mihimakak niini ug miingon nga wala siya’y grupong gikuptan.
Apan si Solante mibutyag nga si Tabasan maoy mi-recruit sa tulo ka manag-agaw nga sila si Harold Hermosilla, 24, Nelson Hermosilla, 24 ug Eldie Flores, 24, nga pulos taga Zamboanga del Sur.
Ang tulo nasikop sa kapolisan sa syudad sa Lapu-lapu dihang gironda sa PIB aron unta pagsikop kang Tabasan sa gahom sa warrant of arrest niadtong Agosto 5 apan wala kini sa maong balay.
Apan gidakop ang tulo human sila nakuhaan og duha ka kalibre .45 pistola nga may mga bala, usa ka kalibre .38 rebolber, usa ka granada ug upat ka paketeng shabu.
Ang pagkaaresto sa tulo lakip na ang pagkatultol kang Tabasan nagsugod sa pagkadakop sa usa ka gipasanginlang tigpayuhot og shabu sa barangay Dakit sa Bogo nga si Arman Tipon-tipon niadtong Agosto 4.
Si CPPO director Sr. Supt. Patrocinio Comendador niadtong nakalabay’ng semana nagkanayon nga adunay planong manulis ang maong grupo dinhi sa Sugbu ug posible usab nga sila mga guns-for hire.
Ang grupo konektado usab sa giingong kanhi sakop sa Kuratong Baleleng nga si Fernando Villanueva Canillo kinsa gipatay uban sa iyang pamilya diha sa barangay Babag sa dakbayan sa Lapulapu niadtong bulan sa Hunyo.
Sumala pa sa kapolisan mga kanhi kauban ni Villanueva sa Kuratong Baleleng pinangulohan ni Ricky Cadavero ang mga mamumuno kinsa pulos na gipasakaan og kaso sa kapolisan. - BANAT NEWS