CEBU, Philippines - Aron modako ang koleksyon sa buhis sa dakbayan sa Mandaue pabayron na unya og buhis ang mga Guest Relation Officers o GRO dungan sa pagkolekta og buhis sa mga bars ug mga balay kahilayan sa dakbayan nga ilang gitrabahoan.
Sa pamahayag ni Mandaue City OIC Treasurer Regal Oliva sa pakighinabi niini sa mga tigbalita ang mga bars magbayad ngadto sa City hall sa ilang Amusement Tax nga mobalor sa 6.6% ug ang mga entertainers, GRO ug mga empleyado sa usa ka balay kahilayan kolektahan og P82.50 isip occupational tax.
Lakip sa pabayron og buhis sa city hall sa Mandaue mao ang mga mokuha og hygiene o health cards ingon man ang mga gagmay’ng tindahan nga adunay mga videoke sa dakbayan sa Mandaue.
Gipasabot ni Oliva nga ang pagkolekta og buhis sa siyudad makapadako sa pundo nga diin gipangkuha ang budget sa mga imprastraktura, proyekto, programa ug uban pa nga bugtong ang makabenepisyo mao ra gihapon ang mga taga Mandaue. - (BANAT NEWS)