CEBU, Philippines - Gibutyag ni Sr. Supt. Patrocinio Comendador, hepe sa kapolisan sa probinsya sa Sugbo nga iyang gipaabot nga moluwat og formal complaint ang magtiayong negosyante og kopras batok sa hepe sa kapolisan sa Pinamungahan ug upat ka sakop niini kinsa gipasanginlan nilang nangawat og P100,000.
Si Comendador mitataw nga iyang giingnan si Marcosa Arañas ug bana niining si Roberto Ongkoy, mga negosyante og kopras nga mobalik sa provincial headquarter niadtong Martes aron moluwat og affidavit kalabot sa ilang pasangil nga gikawat ang ilang P100,000 sa mga polis sa Pinamungahan nga gipangulohan ni Insp. Leo Logroño niadtong Lunes sa ala 1:00 sa hapon didto sa barangay Anislag, usa ka bukirang lugar sa lungsod sa Pinamungahan.
Matud ni Comendador kun dili gyud mobalik sila si Arañas ug Ongkoy iya nalang kuhaan og mga affidavit si Logroño ug ang upat niini ka sakop aron iyang tan-awon kun unsay iyang sunod nga himuon.
Iyang giklaro nga usa ka lihitimong operasyon ang gihimo sa mga polis niadtong higayona nga mitubag og armed person alarm nga daw nangandam nang daan sa ilang servce firearm.
Gipasabot ni Comendador nga ilaha nang gitudlo sa mga polis nga kinahanglan dili mokompiyansa sa ilang kaugalingon kun ugaling motubag og armed person alarm kay nahitabo na kini sa Cebu City Police Office (CCPO) sa dihang siya pa maoy director nga mitubag sa maong matang nga alarma ang duha ka polis apan gipamusil sila sa armadong tawo nga miresulta sa pagkamatay sa duha.
Nahibaw-an sa mga sakop sa media kagahapon nga mibalik gyud sila si Arañas ug Ongkoy niadtong Martes sa buntag sa buhatan sa Provincial Internal Affairs Service (PIAS). (WC) - (BANAT NEWS)