CEBU, Philippines - Laing kaso sa gidudahang typhoid fever kon tipos ang gitutukan sa mga tinugyanan sa panglawas sa lungsod sa Dumanjug particular sa usa ka sitio sa barangay Bitoon.
Gikompirmar ni Dr. Expedito Medalle sa Department of Health (DOH-7) nga aduna sila’y report nga nadawat kabahin sa pagtumaw sa maong sakit sa maong barangay.
Ug padayon karon ang ilang pag-monitor sa maong lugar human mopakita og sintomas sa sakit nga tipos ang pipila ka mga molupyo sa maong lugar nga gipanghilantan sud lang niining semanaha.
Subay sa impormasyong nahipos sa DOH-7 duna nay upat ka pasyente gikan sa maong lugar ang nalandig sa Barili District Hospital nga sikbit nga lungsod sa Dumanjug.
Samtang laing tulo ka pasyente ang nalandig usab sa Vicente Sotto Memorial Medical Center (VSMMC) dinhi sa dakbayan sa Sugbo.
Sa labing uwahing report nga nahipos sa DOH-7 positibo gyud sa tipos ang duha ka pasyente nga nalandig sa VSMMC.
Apan giklaro ni Medalle nga nakagawas na sa tambalanan ang maong duha ka pasyente nga nagpositibo human madapati og tambal samtang nakagawas na sab sa tambalanan ang tulo ka pasyente nga atua ma-admit sa Barili District Hospital.
Nunot niini nagpadala na og mga sanitary inspectors ang DOH-7 sa lungsod sa Dumanjug aron pagsusi sa tinubdan sa tubig niini nga maoy posibling hinungdan sa maong pagtumaw sa sakit nga tipos. - (BANAT NEWS)