CEBU, Philippines - Usa ka maestro sa tunghaang elementarya nag-atubang og imbistigasyon human niini bunali og metrosan ang iyang 12 anyos nga estudyante didto Langtad Elementary School, sa barangay Langtad, lungsod sa Argao sa miaging adlaw.
Si Vicente Lucero, 40. magtutudlo sa maong eskuylahan giingong nasuko lang kay naglabay-labay og ball pen ug papel ang biktima uban sa kauban niini sulod sa classroom
Si Dario Gil, reporter sa DYLA mibutyag sa The Freeman ug Banat News nga segun sa giestorya kaniya sa biktima iyang nasayran nga mao ray gikasuk-an sa suspetsado ang panagduwa sa biktima ug sa kauban niini sulod sa ilang lawak klasehanan dayon mipiti sa meter stick o metrosan ang biktima nga maoy gigamit nga latigo sa iyang maestro.
Miasoy ang biktima nga human sa tulo ka kusog kaayong lapdos sa iyang lawas, nabali ang karaang metrosan dayon giguyod siya sa suspetsado ug gipugos sa pagpagawas ug gimandoan sa pagpalayas uban sa pasidaan nga dili na siya dawaton kun mobalik pagtungha.
Ang biktima kinsa gibati og hilabihang kalisang, wala na mosumbong sa iyang inahan, apan didto sa iyang iyaan sa barangay Candabong sa mao gihapong lungsod nga matud pa makapakurat ang hitsura gumikan sa kaluspad sa dagway niini.
Human hisayri sa iyaan nga giligid diay kini og latigo sa iyang maestro, gidala sa naulahi ngadto sa ilang kapitan sa barangay nga si Arnel Saragena. Gimandoan siya sa kapitan nga isumbong usab ang maong hitabo ngadto sa kapolisan sa maong lugar.
Samtang sa bahin ni Lucero, giangkon niini nga nag-ugtas na siya gumikan sa hilabihang ka-badlungon sa biktima kay nanglabay kini og ball pen sa iyang kauban ug mibahad usab nga andam siyang moatubang sa imbestigasyon.
Sa bahin usab sa principal nga si Jovencia Sanchez, mibutyag kini nga iyang ipatawag si Lucero ug ang tinun-an kini aron masuta niini ang tinuoray nga nahitabo.
Apan ang inahan sa bata nawad-an og pagsalig sa principal sa katahap niini nga areglohon ra ang maong kaso kay matud pa makadaghan na makapanagmal sa iyang estudyante ang maong maestro apan wala kini kasiloti gumikan sa pag-areglo sa kaso.
Gani gibutyag sa inahan sa biktima nga sa wala pa kini mahitabo, gibunalan na og libro ang tangkugo sa biktima ug gani hapit usab kini makuyapi. - (BANAT NEWS)