CEBU, Philippines - Patay ang usa ka batan-ong Hapon human kini malumos sa Isla sa Pandanon lalawigan sa Bohol sa milabay’ng udto.
Ang biktima mao si Komehiro Tsukahara, 25, temporaryong nagpuyo sa Pacific Cebu Resort sa barangay Subabasbas dakbayan sa Lapulapu.
Nasayran sa kapolisan nga mga alas 10:00 sa buntag sa milabay’ng adlaw nag-island hopping ang mga Hapon sa isla sa Pandanon dihang nalumos si Komehiro.
Matud pa ni Atshusi Sekuda kauban ni Komehiro sa dihang miabot na sila sa maong isla nag-snorkeling sila apan pipila ka gutlo kalit lamang nawagtang si Komehiro hinungdan sa ilang pagpangayo ug pakitabang sa ilang tour guide ug dive instructor nga si Gerby Diversion.
Mga alas 11:45 sa udto na mitunga ang lawas sa biktima ug gidali kini og dala sa Mactan Doctors Hospital apan patay na kini.
Nahibulong si Diversion nganong nalumos ang Hapon nga kutob man sa dughan ang dagat nga ilang gilangoyan ug wala usab kini kabatohan sa ilawom nga posibleng napantokan sa ulo niini.
Walay nakitang foul play sa patay’ng lawas sa biktima sa dihang gihiling kini sa mga sakop sa Homicide Section. Buot karon nilang ipa-awtopsiya ang patay’ng lawas sa maong Hapon. - BANAT NEWS