CEBU, Philippines - Wala tagai og gibug-aton ni Mayor Michael Rama ang plano sa City Council nga i-review ang mga ordinansa nga nagtudlo kung kinsa nga mga tawhana ang mahimong sakop sa nagkadaiyang komisyon. Nakapangutana ang mayor kung nganong karon ra kini mitumaw ang maong plano ug nganong wala kini buhata kaniadto.
Kahinumduman nga dunay nahitabong revamp ang mga sakop sa nagkadaiyang komisyon ubos sa mayor’s office apan gitataw ni Rama nga nagbase kini sa balaod ug kwalipikasyon sa mga nanglingkod niini.
Hinuon dili pugngan sa mayor ang plano sa konseho sanglit normal lang kini alang sa kaayohan sa katawhan.
Samtang si Bise Mayor Joy Augustus Young mitataw nga angayan nga duna na gyu’y himuong kausaban sa ordinansa mahitungod sa mga komisyon gumikan kay ubang sakop niini kay napugos lang gumikan kay igo lang mituman sa mandato sa ordinansa. Nagkanayon si Young nga angayan nga ang molingkod nga sakop sa komisyon kadtong interesado ug makatambong sa nagkadaiya nga tigom sa board.
Gikonsiderar usab nga usbon ang pipila ka chairmanships sa nagkadaiyang boards gumikan kay busy na kaayo ang mayor sa ubang trabaho. Gikatahong wala mahimuot si Young sa pagkatudlo ni Renato Mercado nga maoy modumala sa Community Scouts Division and Mining Regulatory Board.
Apan si Rama midepensa nga pulos kwalipikado ang mga tawo nga maoy gipadumala sa nagkadaiyang komisyon. - BANAT NEWS