CEBU, Philippines - Giunay sa pagreklamo sa iyang kaugalingong sakop ang hepe sa kapulisan sa lungsod sa Carmen tungod sa alegasyong pag-areglo niini sa kaso sa usa sa ilang mga dinakpan.
Si PO3 Roger Dilan, team leader sa Carmen Police maoy personal nga nagpa-blotter batok sa ilang hepe nga si Insp. Edgar Awit niadtong Miyerkules sa alas 9:30 sa buntag.
Matud ni SPO2 Simplicio Gibo, desk officer sa Carmen Police Station dihang nahinabi sa Banat News subay sa unod sa gipa-blotter ni PO3 Dilan, gitumbok niini ang ilang gihimong checkpoint niadtong petsa 2 sa nilabay’ng bulan sa Hunyo sa alas 10:30 sa buntag.
Atol sa checkpoint, nasikop nila ang usa ka Virgilio Bueno, nga nagsakay og motorsiklo ug ilahang nakuhaan og usa ka paltik nga kalibre .380 nga pistola ug usa ka magazine.
Sumala pa nga ilaha kining gi-turnover sa ilang buhatan apan daku nalang ang kasurpresa ni PO3 Dilan nga nakagawas si Bueno ug walay kasong napasaka batok niini.
Didto pa niya nahibaw-an nga ang maong kaso gi-areglo ug ang iyang gitumbok nga responsable ang ilang hepe hinungdan nga gipa- blotter niya ang maong panghitabo.
Si Amit nagdumili paghatag og komento gawas sa pag-ingon nga ‘demolition job’ ang gibuhat sa iyang sakop apan iya kining atubangon.
Gihulagway ni Gibo nga wala silay namatikdan nga dunay panagsungi si PO3 Dilan ug ang ilang hepe sa mga nanglabay’ng mga adlaw.
Si Insp. Awit nadestino isip hepe sa kapulisan sa lungsod sa Carmen niadtong milabay’ng bulan sa Marso ning tuiga. - BANAT NEWS