CEBU, Philippines - Gisugdan na sa pagpangguba ang 31 ka mga balay ilawom sa Tagunol Bridge sa barangay Basak-Pardo ning dakbayan sa mga sakop sa Squatters Prevention, Elimination and Encroachment Division (Speed) tungod sa peligrong nagpaabot kanila gumikan sa baha.
Sumala pa sa hepe sa SPEED nga si Noel Artes nga sa miaging tuig pa gipadad-an og notisya ang mga apektado sa demolisyon apan wala kini madayon gumikan sa daghang hangyo sa mga residente sa maong dapit.
Apan niining higayona estrikto nang giimplimentar ang demolisyon gumikan sa nagkagrabeng pagbaha sa maong dapit.
Wala hinuoy kasamok nga nahitabo atol sa maong operasyon tungod kay ang mga residente miduol na sa buhatan sa Division for the Welfare of Urban Poor (DWUP) aron maka-avail sila og relocation site.
Duna pu’y uban sa mga residente ang mi-avail sa Balik Probinsiya Program kung diin tabangan sila sa siyudad sa pagpahimutang sa ilang mga gamit ug paghatud kanila sa tagsa-tagsa nila ka mga lugar sa probinsya.
“Duna uban nga amo nang gipanghatud sa ilang lugar sa Toledo, Oslob ug uban pa,” sumala pa ni Artes.
Nasayran nga ang mga balay sa ilawom sa taytayan ug daplin sa sapa maoy usa sa gibasol sa mga reisdente sa maong barangay nga grabe na kaayo ang pagtaas sa baha sa ilang dapit.
Kini sama sa nahitabong paglapaw sa baha nga naabot ngadto sa unom ka mga sitio sama sa sitio Fatima, Katang-kongan I, Katangkongan II, Kabulakan, Axoville ug Lower Kauswagan. - BANAT NEWS