CEBU, Philippines - Gikonpirmar kagahapon ni kanhi senador John “Sonny” Osmeña nga magpapili siya pagka-kongresista sa ikatulong distrito sa Probinsiya sa Sugbo karong 2013.
Gi-anunsiyo ni Osmeña ang iyang plano gumikan sa kadaghan niyang mga supporter sa maong distrito kinsa miagni kaniya nga mag-kongresista sa maong lugar.
Gani gipasiugdahan dayon sa kanhi senador ang usa ka medical mission kagahapon didto sa barangay Bolongan sa Toledo City diin dul-an sa 500 ka mga tawo ang nakapahimulos niini.
Lakip sa iyang line-up si kanhi Kongresista Antonio Yapha nga modagan sa pagka-bokal kansang kandidato sa pagka-gobernador mao si Liberal Party Provincial Chairman Atty. Hilario Davide III .
Napanglantawan ni Osmeña nga makaangkon siya og kadaugan sa sunod nga eleksyon.
"I don’t want to be shy about it but yes, I will run and Yes I will win not only here in Toledo but also in the entire district because of the good things I've done for them," sumala pa ni Osmeña.
Dugang pa niya nga sa dihang nakadaug siya pagka-senador niadtong 1995 , iya dayon nga nahulma ang lima ka kilometros nga dalan gikan sa main highway sa Toledo paingon ngadto sa barangay Bolongan nga gigastohan og P10 million. - BANAT NEWS