CEBU, Philippines - Nakugang ang hepe sa kapolisan sa Argao human makadawat og tawag gikan sa ilang labaw sa Provincial Headquarters kabahin sa giingong usa ka resolusyong gipasar sa Sangguniang Bayan sa maong lungsod nga naghangyong ipalabay sa gawas sa probinsya ang usa niya ka sakop.
Si Chief Insp. Allan Batobalonos sa pakighinabi sa The Freeman (igsuong pamantalaan sa Banat News) nagkanayon nga si Konsehal Ruben Villamora gialegar nga maoy mi-file niini ug mipadala sa maong resolusyon ngadto sa Cebu Provincial Police Office.
Matud pang Batobalonos buot nga ipalabay gawas sa CPPO si SPO1 Jaime Mendoza tungod sa mga alegasyong drug syndicate protector kini sa maong lungsod ug daghang mga kasong gipangbiyaan nga walay imbestigasyon.
Si Villamora maoy tsirman sa Committee on Peace and Order sa maong lungsod.
Apan si Mendoza mipasangil nga daan nang adunay kasuko kaniya ang asawa ni Villamora nga si Panadtaran barangay kapitan Bonifacia “Pasit” Villamora tungod sa kadaghan sa ilang gipangdakop nga ushers sa masiao.
Sumala pa sa kapolisan nga niadtong nakalabay’ng Sabado sa gabii gianha sila ni Bonifacia sa ilang buhatan ug nasuko tungod sa pagdakop nila sa mga ‘ushers’ sa masiao sulod sa Argao Public Market.
Ang gidakop sa mga polis mao si Edgardo Villamora, 48, nga taga barangay Langtad ug ig-agaw sa konsehal human kini mobaligya og number combinations kang PO1 Manuelito Abrenica uban ni PO1 Gerard Toquero nga nagpakaaron-ingnong mamustahay.
Matud pang Mendoza nga gibanghagan sila ni Bonifacia diha sa ilang presinto ug miingon nga aduna na sila’y kasabutan sa hepe nga matag usa ka pinanser usa ra ang dakpong usher.
Apan si Batobalonos kusganong mihimakak nga aduna sila’y kasabutan sa mga financiers sa ilegal nga sugal.
“Kung gasabot pa mi dili na lang unta ko mo-order sa akong mga tawo nga mag-conduct og saturation drive usa pa nganong di man dakpon nga illegal man na,” pasabot pang Batobalonos. Si Batobalonos sa iyang bahin mibutyag nga wala siya hatagi og kopya sa maong resolusyon maong nahiubos siya niini.
Gisuwayan og kuha sa The Freeman og pamahayag si Mayor Edsel Galleos bahin sa maong isyu apan wala’y mitubag sa telepono niini samtang nagdumili usab paghatag og komento si Bonifacia nga gitawgan sa telepono sa The Freeman.
Si Batobalonos midugang nga mohangyo siya sa Provincial Investigation and Detective Management Branch nga mopahigayon og imbestigasyon sa insidente aron walay bias nga mahitabo. - Brenda D. Batuto ug Ria Mae Y. Booc sa The Freeman/EIM (BANAT NEWS)